අධිවේගයේ බස් රථවල මගීන්ට ආසන පටි පැළඳීම අනිද්දා සිට අනිවාර්යය වෙයි

 

අධිවේගී මාර්ගවල ධාවනය වන මගී ප්‍රවාහන බස් රථවල මගීන් සඳහා ආසන පටි පැළඳීම සැප්තැම්බර් 01 වනදා සිට අනිවාර්යය කෙරුණ ද ඒ සම්බන්ධයෙන් සහන කාලයක් ලබා දීමට පියවර ගන්නා බව අද දෙරණ කළ විමසීමකදී ජාතික ගමනාගමන කොමිෂන් සභාව පැවසීය.

අනතුරුව අදාළ තීරණයට පටහැනිව කටයුතු කරන බස් රථවලට එරෙහිව නීතිමය පියවර ගැනීමට කටයුතු කරන බවයි එම කොමිෂන් සභාව පැවසීය.

මේ අතර ආසන පටි පැළඳීම සම්බන්ධයෙන් මාර්ග ආරක්ෂාව පිළිබද ජාතික සභාවේ සභාපති මංජුල කුලරත්න මහතා මෙලෙස අදහස් පළ කළේය.

"ආසන පටි පැළඳීම කියන කාරණය ඉතාම වැදගත්කොට සලකනවා. මොකද මේ මගින් සිදුවන අනතුරුවලින් වන මරණ සංඛ්‍යාව සෑහෙන ප්‍රමාණයකින් අඩුකරගන්න පුළුවන් කියලා අපිට වාර්තා තියෙනවා. ඒ නිසා අපි දැනට මාස දෙකක සිට දැනුම්වත් කිරීමේ වැඩසටහන් ක්‍රියාත්මක කළා. මේ මොහොත වෙනකොට සියලුම වාහනවල ගමන්කරන රියදුන් ආසන පටි පැළඳින්න ඕනේ මුළු ලංකාවේම ගමන් කරනවානම්.  ඒ වගේම ඉදිරිපස ආසනයේ ගමන්කරන මගියාත් අනිවාර්යෙන් ආසන පටි පැළඳ තියෙන්නේ ඕනේ මුළු ලංකාවේම ගමන් කරනවානම් වාහනයේ. හැබැයි සැප්තැම්බර් 01 වනදා  සිට අපි අධිවේගී මාර්ගයේ ගමන්කරන රියදුරන්, මගීන් සියලුමදෙනා ආසන පටි පැළඳ සිටිය යුතුවෙනවා. අපි මේක සෘජුව අධික්ෂණය කරනවා සමහර වෙලාවට සමහර වාහන නිෂ්පාදකයා විසින් ආසන පටි ලබා නොදීපු අවස්ථා තියෙනවා එම වාහනවල ආසන පටි සවිකර ගැනීම සඳහා අපි මාස 03ක කාලයක් ලබාදීලා තියෙනවා. ඒ ඇර අනෙකුත් සියලුම වාහනවග ගමන්කරන මගීන් ආසන පටි පැළඳීම අනිවාර්යට වෙනවා. ඒක අපි සෘජු අධික්ෂණය සිදුකරනවා."       

මේ අතර අධිවේගී මාර්ගවල ධාවනය වන මගී ප්‍රවාහන බස් රථවල ගමන් ගන්නා මගීන්ට ආසන පටි පැළදීම අනිවාර්ය කිරීමේ ගැසට් නිවේදනය හෙට (31) නිකුත් කරන බව ප්‍රවාහන, මහාමාර්ග, වරාය සහ සිවිල් ගුවන් සේවා අමාත්‍ය බිමල් රත්නායක මහතා පවසයි.

ප්‍රවාහන, මහාමාර්ග, වරාය සහ සිවිල් ගුවන් සේවා කටයුතු පිළිබඳ අමාත්‍යාංශයීය උපදේශක කාරක සභාව පාර්ලිමේන්තුවේදී රැස් වූ අවස්ථවේදී අමාත්‍යවරයා සඳහන් කළේ “ක්ලීන් ශ්‍රී ලංකා” වැඩසටහනේ ප්‍රධාන අංගයක් ලෙස මෙය ක්‍රියාත්මක කරන බවය.

ඒ අනුව සැප්තැම්බර් මස පළමු වන දින සිට අදාළ තීරණය බලපැවැත්වෙනු ඇත.

මීට අමතරව අධිවේගී මාර්ගවල ගමන් කරන පාසැල් බස් රථ, කාර්යාල සේවා ප්‍රවාහන බස්රථ, විනෝද චාරිකා බස් රථ ඇතුළු සෙසු  බස් රථ සඳහා ද ආසන පටි සැකසීමට මාස 3ක කාලයක් ලබාදෙන බවයි බිමල් රත්නායක අමාත්‍යවරයා පවසයි.

විශේෂයෙන්ම රු. 2000ක පමණ මිලකට පැවති ආසන පටිවල මිල මේ වන විට රු.5000ත් 7000ත් දක්වා ඉහළ ගොස් ඇති අතර ඒ සම්බන්ධයෙන් පාරිභෝගික කටයුතු පිළිබඳ අධිකාරිය විසින් ‍සොයා බැලිය යුතු බව ද අමාත්‍යවරයා එහිදී පෙන්වාදී තිබේ.

එමෙන්ම ඉදිරියේ දී දුර ගමන් සේවා බස් රථ සඳහා ද ආසන පටි පැළදීම අනිවාර්ය කිරීමට සැලසුම් කර ඇති බව බිමල් රත්නායක අමාත්‍යවරයා ප්‍රකාශ කර ඇත.

අවශ්‍ය නීතිමය සංශෝධන සිදුකරමින් අධිවේගී මාර්ගයට වාහන ඇතුළත් කිරීමේදී වාහනයේ තත්ත්වය පරීක්ෂා කරමින් ලකුණු ලබාදීමේ ක්‍රමවේදයක් ආරම්භ කිරීමට ද සැලසුම් කර තිබේ.

වාහනවල රෝද  නියමිත තත්ත්වයන් සහ ප්‍රමිතියෙන් නොපවතී නම් එවැනි වාහන අධිවේගී මාර්ගයට ඇතුළත් කිරීමට අවසර ලබා නොදෙන බව අමාත්‍යංශ උපදේශක කාරක සභාවේ දී අමාත්‍යවරයා පෙන්වාදී ඇත.More>>>